Detaje të reja zbulohen nga djegia e kosovarit Xhafer Osmanit, në Derven të Fushë-Krujës. Burime nga grupi i hetimit bëjnë me dije për “Gazetën Shqiptare”, se në krah të makinës brenda së cilës ishte 57-vjeçari, është gjendur nga policia një libër i shenjtë.
Libri i shenjtë është gjetur i pa dëmtuar nga zjarri. Policia ka marrë shenjat e gishtave të gjendura mbi të. Po të njëjtat burime saktësojnë se ka dyshime se viktima është detyruar të betohet mbi librin e shenjtë.
Policia ka dyshime se ngjarja është një krim pasioni, konfliktet e së cilës kanë nisur në Kosovë. Në të njëjtën kohë janë verifikuar lëvizjet e Osmanit. Konkretisht, 57-vjeçari ka hyrë dhe në janar në Shqipëri me mjetin e tij.
Në atë kohë shoqërohej dhe me 2 persona te tjerë kosovarë, dhe qëndroi 1 javë në një hotel në Durrës. Edhe këtë radhë, pra me hyrjen e tij më 29 prill në Shqipëri, u regjistrua në të njëjtin hotel. Por që prej asaj dite nuk ka më të dhëna për lëvizjet e Osmanit.
Për këtë arsye, policia ka dyshime se familjarët kanë dijeni për konfliktin e Osmanit. Kjo pasi familjarët njoftuan policinë 1 ditë para zhdukjes.